WILLEMSTAD: Sentro pa Inovashon i Guia Edukashonal (SIGE) a organisá pa di 10 aña konsekutivo, nan proyekto ‘Duna un Man na bo Ruman’. E meta prinsipal di e proyekto ta pa duna sosten na muchanan di ménos rekurso mediante tas i material di skol, di manera ku nan por kuminsá un aña eskolar ku motivashon i konfiansa propio. Esaki sigur lo garantisá un aña eskolar eksitóso.
Despues di e temporada di preparashon, SIGE a hasi e entrega di e tas- i materialnan di forma ofisial, durante di un rueda di prensa. Maestronan di skol i representantenan di diferente instansia tabata presente pa risibí e materialnan ku sigur lo hasi nan alumnonan kontentu i entusiasmá pa e aña eskolar nobo. Manera añanan anterior, skolnan a duna SIGE nòmber di e alumnonan ku tin nesesidat di e sosten aki.
‘Duna un man na bo ruman’ ta konta ku donashon di diferente kompania. Adishonalmente, e tim di SIGE tabata presente, ku nan buzonnan, na diferente establesementu pa kolektá kontribushon di miembronan di nos kumindat. Durante di e rueda di prensa, Sra. Solange Olaria, direktora di SIGE, a indiká ku e di 10 edishon di e proyekto a enfoká riba alumnonan di skol di fundeshi i tambe skol avansá. Danki na e kontribushonnan risibí i e esfuerso di nan tim, a logra na yuda ku alrededor di 630 tas. Banda di tas, SIGE a yuda algun alumno tambe ku nan unifòrm di skol pa e aña eskolar 2025-2026.
Banco di Caribe ta kontentu di por a kontribuí un aña mas na ‘Duna un man na bo ruman’ i ta aploudí SIGE pa nan dedikashon n’e proyekto ku kada aña ta hasi un kontribushon balioso na futuro di nos hóbennan.
About the Author
