Torneo ta kuminsá awe djasabra 18 di yüli
Willemstad – yüli 2015: Ya ta pa mas ku 7 aña ku Banco di Caribe ta duna su sosten na tim di basketbòl Willemstad Warriors. E kontribushon akí ta parti di Banco di Caribe su kompromiso pa dediká atenshon spesial na desaroyo deportivo di e hóbennan na Kòrsou i tambe pa promové basketbòl lokalmente. Direktiva di e ekipo di Willemstad Warriors ta mira importansia di e torneonan chikitu; nan mes komo ekipo a praktiká kasi 1 aña promé ku nan a partisipá na un kampionato. Di akuerdo ku e entrenadónan, ta e tipo di e torneonan akí ta sirbi komo entrenamentu pa despues sigui desaroyá e hungadónan. Durante e torneonan akí e hóben ta risibí preparashon físiko i mental pa e enkuentronan mas pisá na kua nan lo partisipá.
BdC Willemstad Warriors ta keda manehá pa e propio empleadonan di Banco di Caribe. E torneo lo tuma lugá riba kancha di Stadion di Suffisant (Niels Liberia) i ta kuminsá djasabra awor 18 di yüli i ta finalisá djadumingu 26 di yüli. Durante e torneo akí lo tin e weganan entre Spartacus, Royal Hoops i BdC Willemstad Warriors. Ta bon pa menshoná ku e torneo lo tuma lugá den wikènt riba dianan 18, 19, 25 i 26 di yüli for di 10 or di mainta pa 4 or di atardi. E kategorianan i e timnan a keda repartí di e siguiente manera, U13: Spartacus/ Warriors, U15: Spartacus/ Warriors, U17: Spartacus/ Warriors i U21: Spartacus/ Royal Hoops. Banco di Caribe ta ekstendé un invitashon na tur fanátiko di basketbòl pa presensiá e diferente weganan i sostené e timnan. E torneo di BdC Willemstad Warriors ta pinta di ta unu realmente eksitante!
Pa mas informashon tokante e ekipo di basketbòl BdC Willemstad Warriors i orario di wega durante e torneo por bishitá nan página di Facebook https://www.facebook.com/WillemstadWarriors
About the Author
