Bos di Hubentut ta duna su sosten total na hóbennan di SBO Frater Aurelio den nan akshon di protesta kontra e intento di gobièrnu pa limitá nan derechi riba enseñansa. Ku tur rason nan ta eksigí pa gobièrnu deshasí di su plan pa stroba alumnonan di SBO di subi di nivel despues ku nan a terminá nivel 2 ku éksito. Ta inaseptabel ku gobièrnu ke tòrnu na e derechi fundamental di tur hóben pa disfrutá di enseñansa, ku ta un derechi sagrado ankrá den tratado di Nashonnan Uní. Tur hóben ku ta studia na SBO mester tin e oportunidat pa subi i alkansá nivel 3 i 4, logra lo máksimo di nan kapasidat. Loke hóbennan tin mester di dje no ta medidanan ku ta demotivá nan manera e plan aktual di gobièrnu, sino medidanan ku ta subi kalidat di enseñansa lokual mester enserá entre otro mas i mihó guia pa hóbennan durante nan estudio. Nos sa ku tin grupo basta grandi di hóben ku ta bai skol ku un peso grandi di problema personal i sosial riba nan skouder, ku tin un efekto negativo riba nan prestashon. Pesei guia i sosten ta asina importante, no solamente di e dosente pero tambe di otro profeshonalnan ku mester ta na disposishon di e hóben, manera sikólogo i trahadó sosial. E sosten i guia ei ta indispensabel pa evitá ku sierto hóbennan ta kai atras den nan estudio. Pero e sosten ei no ta eksistí aktualmente. Na lugá di tuma medida pa mehorá kalidat di enseñansa, gobièrnu ke pa e hóben di SBO stòp di studia i bai traha, miéntras ku nos tur sa ku no tin trabou pa hóbennan. Bai traha unda? Kòrsou su ekonomia ta pasando den momentunan di krisis kreando mas desempleo bou di hóbennan. Asta hóbennan ku nivel mas haltu di estudio ta solisitá pero sin resultado positivo. Atrobe nos ta mira ku si bo mayornan no por paga skol privá, bo posibilidat pa studia ta limitá pasobra gobièrnu no ta kere den desaroyo di su pueblo. Ta inkomprendibel ku aki na Kòrsou gobièrnu ke kòrta den enseñansa, miéntras ku na otro partinan di mundu ya pa basta tempu ta reina e konsiensia ku enseñansa ta e yabi pa progreso i ku mester invertí den enseñansa si un pais realmente ke progresá ekonómikamente i krea mas kupo di trabou pa su habitantenan inkluso su hubentut. Ya kaba nos tin un enseñansa ku no ta kreando suidadanonan independiente, ku vishon pa yuda den desaroyo di nos pais. Semper mester buska estranhero pa yuda nos sali for di kualke pèrtá ora bin proyektonan grandi. ta dikon nos ke limitá nos mes hendenan ? Tur pais ku ta respetá su mes ta pone su suidadanonan na promé lugá. Invershon den enseñansa ta e solushon i no kòrtamentu! Bos di Hubentut ta aploudí e hóbennan di Frater Aurelio SBO ku a demonstrá kurashi pa sali dilanti pa nan derechi riba enseñansa i a logra haña hopi sosten di otro hóbennan i tambe di mayornan. Nos a komprondé ku minister di enseñansa a reuní ku direktivanan di skol pa papia di e intenshon di gobièrnu pa limitá posiblidat di sigui studia na SBO. I nos ta spera ku minister lo skucha tambe e hóbennan ku ta protestando, pasobra nos sosiedat tin e mal kustumber di disidí tur kos pa hóbennan sin ku nunka ta puntra e hóben su opinion. Den e kaso akí hóbennan di SBO ta hopi firme i desididu den nan opinion. Nan no ta aseptá ku ta kita niun parti di nan derechi riba enseñansa. E hóbennan akí meresé sosten di tur hende i organisashon ku realmente tin bienestar di hóbennan na pechu. Nos sosten nan tin sigur! Sra. Anne-Sheila Albertoe Direktor di Fundashon Bos di Hubentut Telefòn; 4622442-4618103 E-mail: bosdihubentut@gmail.com
About the Author
