WILLEMSTAD – 27 di ougùstùs 2017 – sr. Charlwin Marshall, mihó konosí komo ‘Chef Broertje Marshall’ próksimamente lo kompetí den otro evento kulinario internashonal, e biaha aki na Sur Afrika. E ‘Ultimate African Heritage, Food, Drinks and Music Festival’ e aña aki, pa promé bes lo figurá delisianan di Kòrsou tambe! E kompetensia lo tuma lugá na Soweto, un siudat na Johanessburg, konosí komo lugá di nasementu di gran personahe polítiko Nelson Mandela i Obispu Desmond Tutu.
Pa Chef Broertje Marshall partisipashon den e ‘Ultimate African Heritage, Food, Drinks and Music Festival’ ta un paréntesis den su kuríkulo ya kaba impreshonante. Próksimamente tòp Chefnan di Afrika lo kompetí pa e título máksimo den ‘Nelson Mandela Culinary Challenge’ i Chef Broertje Marshall lo tei pa representá Kòrsou. Durante di e kompetensia Chefnan lo mester presentá e mihó smak i kreatividat den e segmento di barbekiú i tambe lo mester duna presentashon di ‘arte’ riba un plato.
E kompetensia lo tuma lugá di 31 di ougùstùs pa 2 di sèptèmber próksimo; un total di 50 tòp Chef lo kompetí durante tres dia pa e título máksimo. Riba e último dia lo saka e “Nelson Mandela Challenge Chef”. Chef Broertje Marshall ademas di ta resipiente di un ‘Dushi Hende Award’ i Krus di Mérito 2017, semper por a konta ku sosten di CTB. E kolaborashon ta mutuo; na vários okashon Chef Broertje Marshall a kompañá CTB durante eventonan promoshonal den eksterior i resientemente e tabata parti di e felisitashon di Dia di Bandera ku CTB a kompartí ku komunidat. CTB lo sigui asistié pa e sigui promové nos isla den e ámbito di gastronomia internashonal. Hopi éksito!
About the Author
