A hasi e inisio simbóliko di e konstrukshon
WILLEMSTAD – Ora ku ámbos a hinka un skòp den tera, djamars minister-presidente Gilmar Pisas, asistí pa minister Charles Cooper di VVRP, i e doño Bastiaan Guis di e dunadó dje enkargo Pen Resort B.V. simbólikamente a duna e señal pa konstrukshon di The Pyrmont Hotel tuma lugá. Di pursi, for di kuminsamentu dje aña aki ya ta trahando duru pa den e kuater kuartal di 2025 por logra realisá un hotèl nobo i moderno ku tur su fasilidatnan korespondiente den e área kaminda e Distrito di Pietermaai i Penstraat ta topa otro.
Aworó The Pyrmont Hotel bou di bandera di Autograph Collection lo konta 300 kamber luhoso, inkluso 25 suites históriko di luho. Ademas e lo tin entre otro ocho restorant i bar, un ballroom, akohida pa mucha i un klup di hóben, un sentro di fitness i un sentro di sambuyamentu i deporte akuátiko. E wéspetnan di hotèl lo por pasa momentonan agradabel na un di e tres pisinanan òf na e playa tras di e kibra-olanan ku lo traha i na un koredor di 225 meter largu.
Autograph Collection
Den su diskurso señor Mark Nooren, vise presidente pa operashonnan di Grupo EPDG Hospitality Management, a splika ku den e área entre dos edifisio ikóniko, esta e loke tabata Cerro Bonito i loke ántes tabata Kas di Pueblo, lo aparesé un hoya di un hotèl luxury all inclusive: un diamante nobo na e kolekshon di mas ku 200 resort luhoso bou di maneho di Autograph Collection, un divishon spesialisá di e kadena internashonalmente famoso di Marriott. Kada hotèl di Autograph Collection ta úniko i no tin niun igual n’e.
Edifisionan históriko
A base di e filosofia aki di Autograph lo renobá ámbos edifisio históriko i inkluí nan integralmente den e hotèl Pyrmont pa perkurá pa prolongá nan herensia kultural i históriko. Te kasi un siglo pasá tur dos edifisio tabata propiedat di e prominente famia lokal Maduro.
Na Cerro Bonito, un edifisio neo-klásiko segun diseño di e arkitekto Bartholomé Lyon for di Corsica, e tempunan aya a organisá evento spesial, manera show di gala i soiré privá kant’i laman. Despues e edifisio a sirbi entre otro komo hotèl. Den e proyekshon nobo e lo bira un resorant signature bou di e nòmber Cerro Bonito. Mas pariba den Penstraat tin e edifisio di Kas di Pueblo – ku famia Maduro a nombra na honor di Reina regente Emma van Waldeck-Pyrmont – tabatin diferente papel den kurso di añanan promé ku na 1948 e partido polítiko NVP a kumpr’é – p’esei e koló bèrdè – i te algun dékada pasá el a sirbi komo sede dje partido. Den e plannan di Pyrmont lo agregá un ballroom i un spa luhoso.
Puestonan di trabou
Anteriormente e aña aki e desaroyadó Pen Resort B.V. a ranka sali. E tempu total di konstrukshon lo tuma 32 luna i e entrega lo tuma lugá den e di-dos mitar di 2025. Mas e proseso di konstrukshon progresá, mas tantu trahadó di konstrukshon lo ta envolví. Durante e momento pik lo tin 250 trahadó, den mayoria lokal i di vários disiplina, lo haña trabou na The Pyrmont Hotel.
E proyekto ta rekerí un invershon total di 87 mion dòler Merikano. Señor Nooren a mustra tambe riba e balor ekonómiko agregá ku The Pyrmont Hotel lo tin unabes e ta operashonal. E lo pèrkurá, segun kálkulonan, pa 350 puesto direkto di trabou na diferente sekshon i nivel, i 150 puesto indirekto di trabou mas. Ta antisipá ku e hotèl aki lo atraé alrededor di 30.000 wéspet for di eksterior pa bini Kòrsou pa sera konosí ku e karakter úniko dje isla. Pa por akomodá nan tur, lo mester di airlift adishonal.
Durabilidat
Ta opvio ku den e proseso di konstrukshon i e eksplotashon despues lo apliká e instrukshonnan di ‘green’ mas tantu posibel. Den kuadro di e pensamentu di durabilidat lo hasi uso di e instalashonnan di awa di laman konforme e prosedimentu di OWAC pa fria e espasionan paden. Segun ku a kalkulá, esei lo ekonomisá alrededor di 75% riba e gastunan di energia. Ta bai isolá e daknan spesialmente pa tene e kalor pafó. Ademas, lo pone pènel solar riba e daknan pa yuda redusí e gastunan di elektrisidat. Pa irigashon di e hardinnan lo apliká e grey water ku nan mes ta produsiendo.
About the Author
