Riba djabièrnè 17 di mart 2017 Fakultat General di UoC huntu ku FPI a presentá nos Diktado Nashonal Papiamentu pa di diesdos biaha. Generalmente e diktado ta tuma lugá riba 21 di febrüari. Esaki ta dia internashonal di idioma materno. Na momentu ku e fecha ei tabata aserkando na febrüari, mas i mas kandidato fanátiko tabata puntra pa e diktado. Nan tabata strañá ku nan no a mira e anunsio niun kaminda. Nan a sinti falta di e konkurso i pa nan sensashon mesora tambe selebrashon di Dia di Papiamentu. Pa evitá interferensia di karnaval, e aña akí a skohe pa tene e diktado papiamentu dia 17 di mart. E anochi a resultá ameno i agradabel, na honor i realse di
papiamentu. Mayoria kandidato a inskribí adelantá i por a drenta sala 19.30 or despues di registrashon. E anochi a start eksaktamente 8’or ku un kaluroso bonbiní di MC, señora Muriel Meyer MEd. Den un introdukshon kòrtiku ku a sigui, presidente di hurado, prof. dr. Ronnie Severing, a duna splikashon di e reglamento ku lo a konta pa e diktado. Sekretario di hurado drs. Ithel Brute, huntu ku e sala, a pasa den e retonan ku e diktado tabata kontené, pa asina kontrolá e trabou. Mervina Bilkerdijk MEd a fungi komo di tres miembro di hurado.

Tin di nota ku e miembronan di hurado, e lesadó i e MS tur ta dosente di Fakultat General di Universidat di Kòrsou. Señora drs. Farienne Martis tabata presente representando FPI i dr. Liesbeth Echteld komo dekano di Fakultat General. Elvira Bonafacio MEd a risibí kòmplimènt di sala komo ku el a lesa e diktado na un manera tremendo. E diktado tabatin e título: Bo tambe a sintié? Naturalmente esaki ta referí na e sakudimentu sorprendente ku a laga Kòrsou resientemente pasa un sustu. Tabata un teksto ku desafio fuerte, kaminda mayoria reto di ortografia di papiamentu a keda eksponé. E partisipantenan, ku tabata varia di edat entre 11 i 70 aña, a yega na un promedio di 16,2 eror. E damanan, ku tabata presente den un mayoria den e ouditorio, a presta mihó ku e kabayeronan i e grupo di edat di 25 pa 40 aña a skor mihó ku un averahe di 9 eror. Hurado a selektá e tres mihó kandidatonan ku e kantidat mínimo di eror. Asina di tres premio a bai pa Rudina Gomez. Di dos premio tabata pa
Winette Jansen, i e promé premio, finalmente a bai pa Anshayra Chirino. Bon meresí komo e tabatin sero eror. Esaki no sa sosodé ku frekuensia. Tabatin bunita premio disponibel pa e tres ganadónan. E partisipante mas hóben Zhugeina Willems a risibí un Kontrografia elektróniko di Papiamentu di regalo komo premio di estímulo. Tur kandidato a risibí un sertifikado di partisipashon. Irespekto e kantidat di eror, mayoria ta gosa sigur di e parti di anochi kaminda konhuntamente ta trata e difikultatnan. E ta instruktivo i bo por diskutí na un nivel altu i skèrpi tokante e reglanan ortográfiko di papiamentu.