Dr. Jurenne Hooi di Programa di Urgensia huntu ku Minister di Enseñansa, sra. Marilyn Alcalá-Wallé ta inougurá brass band na Ancilla Domini.

WILLEMSTAD – Djaluna 30 di aprel mainta na Ancilla Domini VSBO a klousurá den un forma festivo, e proyekto Siman di Sèn 2017, ku a kuminsá for di aña pasá. Ancilla Domini VSBO a risibí ofisialmente nan instrumentonan di brass band. E manager di e Programa di Urgensia, sra. dr. Jurenne Hooi, Minister di Enseñansa, sra. Marilyn Alcalá-Wallé, presidente interino di Banko Sentral, sra. Leila Matroos-Lasten i direktor di BDO Dutch Caribbean, sr. Michel Falke, tabata tei presente pa inougurá e brass band.

E proyekto di Ancilla Domini VSBO ta enserá kompra di instrumèntnan pa un brass band propio. Huntu ku trahadónan di Banko Sentral di Kòrsou i St. Maarten i BDO Dutch Caribbean, nan a siña durante di un aña kon pa traha un presupuesto i nan a bai buska fondo pa e proyekto aki. Nan a siña tambe kon pa hasi un análisis di preis i kalidat, pa despues nan por a kumpra e instrumentonan i lanta nan propio brass band.

Ademas for di Hulanda, e skol a risibí sosten di alumnonan di Orion College na Amsterdam pa e proyekto aki. E alumnonan di Orion College tambe a buska fondo pa e instrumèntnan. E skol na Hulanda tabatin sosten di e tim di Cash Money Budget (CMB) di Stichting Maatschappelijke Dienstverlening Amsterdam (MaDi), kaminda sra. dr. Jurenne Hooi tabata direktor. MaDi a introdusí Siman di Sèn na Kòrsou den aña 2016. Na Kòrsou e proyekto a wòrdu sostené dor di BDO i Banko Sentral.

Banko Sentral i BDO ta sostené Programa di Urgensia pa implementá proyektonan di edukashon finansiero den e kuater barionan di Programa di Urgensia e aña eskolar binidero. Manera ta konosí Programa di Urgensia ta dirigí su mes riba mehorashon di e situashon di biba i traha pa pueblo di Kòrsou, ku e enfoke riba Montaña, Buena Vista, Otrobanda i Barber.

Siman di Sèn ta un proyekto ku tur aña ta keda organisá na Hulanda, kaminda tur skol básiko i sekundario ta partisipá. Profeshonalnan den e mundu finansiero, riba petishon, ta duna kurso i workshopnan grátis na diferente skol. Ademas, e materialnan ta disponibel grátis pa e lèsnan aki.