Willemstad – Fin di yüli aki Federashon di Ahedres Kòrsou (FEDAKO) lo manda 2 ekipo di Kòrsou, un femenino i e otro maskulino, pa representá nos pais durante e olimpiada di ahedres na Noruega. E olimpiada di ahedres ta e evento pa ekipo mas grandi na mundu kual e federashon mundial di ahedres (FIDE) ta organisá kada dos aña. Mas ku 1800 hungadó di 180 pais lo partisipá na e próksimo olimpiada di ahedres ku lo tuma lugá na suidat Tromsø di Noruega di 1 te ku 14 di ougùstùs binidero. Noruega ta pais di e gran maestro Magnus Carlsen kende na novèmber 2013 a keda korona komo e kampeon mundial. Kada un di nos ekiponan lokal lo konsistí di e kuater hungadó i un reserva. Kada ekipo lo hunga 44 partido durante 11 buèlta. Den pasado vários di nos atletanan lokal a logra di optené títulonan di ahedres den e torneo aki i hasta logra di bin kas bek ku medayanan di plata i bròns pa nan prestashon individual. Kòrsou lo ta representá pa nos mihó ahedresistanan entre kual e dos ganadornan di medaya, WFM Maria Vinck-Diaz i Rurik Capella kendenan lo bolbe buta nan táktika, strategia i abilidat mental na prueba. FEDAKO ta deseá tur nos representantenan tur klase di éksito. FEDAKO ta gradisí tur e spònsernan ku a yuda hasi posibel pa e dos ekiponan por partisipá na e magno evento aki i spesialmente e spònser prinsipal MCB pa su sosten na nos delegashon i e deporte di ahedres en general.
About the Author
