Riba dia internashonal di hende muhé. Muhé(nan) firme ta un grupo di sosten pa eduká, entretené i asistí tur hende muhé na Kòrsou, sin ningun klase di distinshon. Den futuro nos ke pone atenshon na nos hóbennan tambe, pa di e forma aki krea un fundeshi stabil i duna un aporte na nan desaroyo.
Muhé(nan) firme ta un organisashon no komersial (non-profit).

Nos Logo SU NIFIKASHON

Nos logo a wòrdu diseñá ku e pensamentu pa stimulá positivismo. E figura dilanti di e kara, ta representá un solo, indikando pa keda kabes na laira muhé paso e solo lo sali. E kolo lila di e kara ta representá altesa, noblesa, poder i ambishon. E palabra muhé(nan) ta nifiká ku sea individual of komo grupo nos por
alkansá hopi basta nos kere den nos mes. E estilo di letra ku a wòrdu skohe pa e palabra (firme) ta simbolisá firmesa, klase i delikadesa. Nos lema; “womening up” ta ora pa nos tur lanta para huntu komo un unidat kibrando bareranan ku a buta un límite na loke nos hende muhé por alkansá. Nos logo a wòrdu diseñá i kreá dor di nos Vise-Presidente Shanouelka Hodge.

Mishon

Nos mishon ta pa empoderá i asistí hende muhé, di tur klase sosial den kada aspekto di nan bida. Tambe nos ke enfatisá pa ningun hende muhé keda atras ora ta bin na bienestar di salú mental, emoshonal of físiko. Nos ke krea un espasio, sano i konfortabel kaminda hende muhé por aserká si mester yudansa of guia pa kualke situashon ku presentá den nan bida.

Vishon

Nos Vishon ta pa e hende muhé nan di Kòrsou, bini huntu i forma un Plataforma fuèrte ofresiendo asistensia i sosten na otro, sin husgá otro su pasado of klase sosial. Abase di nos inisiativa i esfuerso nos meta ta pa empodera i inspirá hende muhé pa ta e mihó vershon di nan mes i hasi un impakto positivo, tantu komo den nan bida personal i den sosiedat. Nos vishon ta un komunidat di hende muhé fuerte riba e isla di Kòrsou pa bini huntu, i ta 1 unidat.

Plan di Akshon

Muhé(nan) firme ta un organisashon ku tur hende muhé ta bon bini i por forma parti pa medio di membresia. Nos membresia ta kosta solamente 15 florin pa luna. E fondonan aki ta yuda nos pa ku organisashon di diferente otro eventonan ku nos tin den tapara. Nos lo ranka sali ku e promé evento dia 4 di juni, kual ta un feria pa hende muhé. E feria tin un konsepto di ban topa na un eskala grandi, ku diferente aktividat informativo, entretenimiento, benta di diferente produkto i servisio pa hende muhé. Relashoná ku e evento grandi aki, si abo empresario chikí of grandi, coach, instruktor of kualke hende ku ta sinti su mes yama pa forma parti di nos feria di hende muhé por aserka nos libremente via di nos plataforma nan di media sosial of email. Aparte di nos feria tambe nos lo tin diferente aktividat nan manera workshop, charla, seminario, rekoudashon di fondo i obra di karidat.

Direktiva

E direktiva ta konsisiti di 4 hende muhé firme i dinamiko.
Suenn Antersyn, Presidente, Shanouelka Hodge, Vise-Presidente, Jurina Constancia, Sekretaria, Urshanny Hernandez, Tesorero