Willemstad- 5 di Yüli 2016 – E partisipantenan na e “Walk for the Cure Dinner and Movie” a gosa di un sena di tres plato delisioso i a kulminá nan anochi ku e premier di e pelíkula tan komentá “The Independent Day”. Tur loke a keda rekoudá ta bai pa un kousa ku hopi di nos tin na nos kurason esta e lucha kontra di kanser.
E Walk for the Cure Dinner and Movie ta marka inisio di e banko su esfuerso e aña aki pa generá mas tantu fondo, bou di tantu su mes personal komo den komunidat, na kaminda pa e CIBC FirstCaribbean su Walk for the Cure 2016 ku ta tuma lugá próksimo Òktober. CIBC FirstCaribbean su Walk for the Cure ta na benefisio di organisashonnan di kanser den region di Karibe. E aña aki atrobe lo reuní mas di 20 mil partisipante pashoná den 17 pais, den kua e banko ta operá, i uni nan den un demonstrashon unifiká di nan kompromiso pa sostené esnan afektá pa kanser.
Den e último kuater añanan e evento aki ya a generá US$800,000.00 den henter e region Karibense komo sosten na kuido kritiko kontra kanser, kompra di ekiponan vital nesesario pa tratamentu di pashènt i programanan di edukashon general pa krea mas konsientisashon pa e malesa den henter e region. Tur fondo generá na Kòrsou ta bai pa Stichting Prinses Wilhelmina Fonds.
Konkluyendo ku e evento tabata unu éksitoso CIBC FirstCaribbean ta gradisí e patrosinadònan Renaissance Mall & Rif Fort, Pringles, Presidente, United Distributors (Kendall- Jackson), Amigoe, Antilliaans Dagblad i Extra i esnan ku a kontribuí esta Anchor Restaurant, Bistro Le Clochard, Ristorante Zabbia i The Cinemas pa e sosten i koperashon. Marketing Manager di CIBC FirstCaribbean, Lysaira Ortela, kende tambe ta lider di e banko su komishon pa generá fondo di Walk for the Cure a bisa ku e evento no por tabata eksitoso sin e kontribushon generoso di tantu patrosinadó i e instanshanan ku a kontribuí.
Ela ekspresá mas aleu su gradisimentu na tur persona ku a asisiti na e evento i boluntarionan, agradesido ku nan a hasi un kontribushon hopi apresiá na e lucha kontra di kanser.
About the Author
