Djadumingu, 21 di yüli 2013, tabatin un “Domingo Kultural Literario” na Sentro di Bario Santa Rosa. Durante di e evento aki, Gysèl Inecia, yu muhé di e konosido artista Tio Ali, a batisá su promé buki di poesia titulá: “E otro banda di Tata”. Kas di Kultura tabatin na su enkargo imprenta di e kolekshon di poesia akí. Alabes kolaborador Ivan Felipa, a representá Kas di Kultura durante di e boutismo di ‘E otro banda di Tata’. Komo muestra di gradisimentu pa e 
kolaborashon di Kas di Kultura, Gysèl Inecia a hasi entrega di algun ehemplar di su promé buki di poesia na Direktor di Kas di Kultura, sr. Gilbert Bacilio. Kas di Kultura den su afan pa sigui promové i enrikesé kultura di Kòrsou i den su empeño pa stimulá hóben pa nan usa nan kreatividat riba tur tereno di bida i riba tur tereno di kultura i arte, ta deseá Gysèl Inecia tur klase di éksito ku su buki di poesia. Kas di Kultura ta spera ku Gysèl Inecia lo sigui produsí mas obra literario i ku e lo motivá otro hóben pa nan tambe pone nan ideanan, pensamentunan, sintimentunan i eksperenshanan riba papel. Pabien na Gysèl i hopi éksito den futuro!
About the Author
