Faltando 1 luna mas pa karnaval, Grupo Karnaval Helengue ta anunsiá ku lastimamente no por bai mas ku e konstelashon Nsty Play/Cache Royale pa karnaval 2016. Ta asina ku e bandanan mester a join i bira 1 pa engrandesé e parti di entretenimientu. E desishon a kai ayera serka e miembronan promé mirando ku Helengue ta kompartí tur informashon ku su direktiva siguí pa ku e miembronan i despues pa e publiko. Mester bisa ku hopi kautela mester a analisá e plan di e parti di entretenimiento den su profundidad pa e parti audio i visual i tambe e parti logístiko pa ku Helengue den karnaval. E desishon a kai debí ku mester hasi algun ahuste pa un  resultando positivo. Danny Yanga ku ta e lider di e grupo a avisá e miembronan ku e desishon lo bai kai i e pakiko i dikon, i tur miembro a bai di akuerdo. Nos tey pa keda i pone pasonan firme ku pa e grupo. Grupo Helengue ta un grupo ku sigur a ser fundá pa keda bai kada aña karnaval i pa keda engrandesé e fiesta kultural i alabes keda un grupo ku no ta traha pa awe i gosa pa awe so, pero traha konforme i bibando ku e realidat ku nos ke pa Helengue keda siguí krese kada aña di nobo i pa asina pa años nos por establesé nos mes den e ruta di karnaval. Grupo Helengue ta un grupo ku ta kere den amor di e famia Helengue i pa nos siguí krese i tambe pa kos kana bon. Den e kaso aki Helengue a ahustá pa asina por enfoká riba e parti di kalidat ku ta e number 1 di nos prioridatnan. Karnaval ta un temporada dushi, pero ku hopi trabou i bo mester ta na tempu pa analisá i studia i despues kisas dal 1 stap patras pa bo dal 10 bai dilanti den futuro. Den e konstelashon pa marcha di karnaval Helengue ta bai engrande ku “the best of the best” di aña 2015 kual ta Dj RO-1, Dolce, HNLY (algun spot). I e artista grandi i internashonal ku ta Alison Hinds ku ta bai marcha i engrandesé Helengue i Kòrsou su karnaval 2016. Helengue ta bin ku hopi entretenimientu visual pa tantu e Helengueronan i pa e publiko. E Helengueronan ta prepara i ketu bai Helengue ta keda traha duru pa asina nos por hasi un debut magnífiko i alabes históriko pero tambe pa abo komo publiko gosa i disfrutá ora Helengue ta debutá den kayanan di Kòrsou. Helengue ta keda siguí plama vibrashon positivo i alabes ta bisa, Helengue ta nos tin E Ambiente.