Prevencion di Diabetes 2 mester cuminsa na un edad hoben Bo tabata sa cu refresco tamaño “Large” ta contene 27 telep di sucu

ORANJESTAD, Aruba – November 2015: Riba 14 di november, “World Diabetes Day”, Dr. Horacio E. Oduber Hospitaal y otro instancianan activo den cuido y riba tereno di salubridad publico ta subraya e importancia di prevencion di Diabetes. Aruba tin un incidencia halto di e enfermedad cronico no contagioso aki cu ta resulta principalmente di un estilo di bida cu no ta saludabel y ta resulta den sobrepeso y obesidad, cual ta pone stress riba e funcionamento di cierto organonan.

A opta pa uza e luna completo di november rond di ‘World Diabetes Day” pa campañanan di conscientisacion pa cu prevencion di Diabetes, pero tambe pa cu su diagnosis tempran y cuido di pashentnan.

Angelique Salsbach, kende ta dietista/nutricionista na Dr. Horacio E. Oduber Hospitaal, ta splica cu e cifra di sobrepeso y obesidad entre tieners y preteens na Aruba ta hopi halto y e condicion aki na edadnan mas halto, combina cu un estilo di bida no corecto por causa Diabetes tipo 2.
E causante mas grandi di e sobrepeso entre nos hobennan ta entre otro “sucu”, segun Salsbach ta subraya. E ta conseha pa bebe mas awa y te sin sucu. Esaki ta e unico bebidanan cu no ta contene sucu.

Pa agrega un poco smaak na e awa por ehempel por pone pida di diferente fruta den e awa, por opta pa un te di fruta, menta of otro yerba. Esaki ta e miho bebidanan cu por bebe durante di henter dia. Salsbach ta añadi cu hopi biaha e escogencia pa un juice no ta malo, pero semper mester check e cantidad di sucu cu e tin aden. Hopi bebida cu ta pone hende pensa cu ta trata di un juice saludabel,  ta pa tur e fruta bunita cu tin poni riba e paki of boter, pero en realidad ta contene un porcentahe masha abou di fruta , pero si tin hopi sucu.

Hopi hende no ta para keto un rato na e informacion di contenido di nan bebida y tampoco na e “serving size”, asina nan ta bebe bebidanan cu hopi sucu cu ta bin den paki grandi cu ta casi of hasta mas di dos biaha un “serving size” cu ta conseha.
Entre bebidanan cu Salsbach ta menciona tambe tin ice tea y refresco. Ningun persona ta pone 15 telep di sucu den nan te, pero tin di e bebidanan cu ta bin cu por lo menos 15 telep den un “serving size”. Tene bon na cuenta cu refresconan di e tamaَño “Large” tin 27 telep di sucu.

Angelique Salsbach ta splica cu bebe e asina yama “sugary drinks” cu el a menciona ta parti di un estilo di bida cu no ta saludabel, specialmente si tuma den consideracion cu hendenan cu bebe un di e bebidanan aki no ta bebe uno so, pero mas di un pa dia.

E nutricionista ta pidi, concluyendo, pa comunidad pone atencion riba e consumo y mas bien e consumo excesivo di bebida yena cu sucu entre mucha y hoben, pero tambe entre adulto; adopta habitonan mas saludabel y yuda asina preveni Diabetes tipo 2.