Willemstad – Durante un transmishon live via e pagina di facebook di IBFF Curaçao djasabra ultimo, Ayanette Statia, direktora di IBFF huntu ku Miss Curaçao Teenager 2019, Tkeyah Eugenio i 10 ex miss teenage den nos historia, ta habri e temporada ofisial di e sertamen mas importante na Kòrsou pa nos hóben damanan.
Apesar di e situashon difisil ku Kòrsou i mundu kompletu ta pasando aden dor di e Covid-19, Ayanette a yega na un forma moderno, kumpliendo ku tur e reglanan, pa habri e temporada ofisial di un forma uniko i pa promé biaha na Kòrsou.
Durante e transmishon live por a skucha e historia di Miss Teenage for di aña 1968 te na aña 2002 organisá pa CYBECO i tambe for di 2004 organisá dor di IBFF Curaçao. Nos Miss Curaçao Teenager kompañá pa e 10 miss teenagenan a desfilá trahenan di Caprichos de mujer i na final a konta un tiki di nan eksperensia.
IBFF Curaçao ta sumamente kontentu i ta gradisí pueblo di Kòrsou pa e sintonia i sosten di semper durante e transmishon. Tambe un danki na tur e patrosinadornan, manera Acoya, Leo Sound & Lighting i CuraLive Stream ku a depositá nan konfiansa den IBFF Curaçao pa hasi e anochi posibel.
Inskripshon a habri ofisial djasabra 9 mei 2020 i lo sera 30 yüni 2020. Tur hóben dama entre 14 pa 17 aña di edat i di nashonalidat Hulandes, por subi riba e pagina di facebook di IBFF Curaçao i inskribí via e link ofisial. Pa mas informashon por yama na e number 513-7717 òf 521-6890
Sertamen Miss Curaçao Teenager lo tuma lugá 4 di òktober 2020! Mester anunsiá ku tur kos ta dependé di e desaroyo di Covid-19 aki na Kòrsou.
About the Author
