Djabièrnè último 22 di ougùstùs, a tuma lugá un tremendo homenahe musikal na e tata i kreador di Salsa Antiano, Don Macario Prudencia , riba e patio di Betesda dilanti un públiko hopi grandi. Tabata un anochi impreshonante kaminda por a nota un gran kantidat di baluarte, ku tin vários tempu sin topa,ku a bin honra Macai ku nan bishita. Nos ta referí aki na e.o. Erwin Prudencia, Clifford Quarles, Clifton Daal, Alcides Keep, Carlos Salsbach, Arnel Salsbach, Idelco Coffie,Luti Samson, Boy Dap, Sidney Mr.Saab Isidora, Darwin Gregg, Nolly Felida, Anralis Dap, Johny Maduro, Stanley Reinilia, Harry Moen,Norman Kooks, Farley Lourens i hopi otro músiko konosí mas. Danki na hopi esfuerso i bon koperashon di parti di IpFM, sra Ruth Samson, Hildo Manuela i Feko Gomes, en koperashon ku sra Migdaris Mercera, Mariela Romero i Solange Romano di MCB i gerensia di Betesda, e aktividat aki a bira eksitoso i históriko. For di 5.30 atardi e hóbennan di 8 pa 14 aña, ku ta haña lès den bario a presentá pa promé bes riba esenario pa duna un tremendo presentashon i nan tur a risibí un tremendo aplouso di e públiko presente. Seguidamente a presentá Jnnior All Star number 2, ku ta konsistí di hóbennan, ku tambe pa promé bia, a presentá riba un tarima , durante un programa ofisial, a presentá den gran forma i nan tambe a risibí un tremendo aplouso. Durante un parti ofishal, tabatin palabra di Feko Gomes, na nòmber di Instituto pa Formashon Musikal, representante MCB, i Betesda i Macario Prudencicia. Finalmente Jnnior All Star bou di direkshon musikal di maestro Gedion Chandler a presentá algun número varia, pa despues toka e númeronan di Macai na un nivel musikal hopi haltu Tur esnan presente a keda impreshoná pa nota ku kada bes e hóbennan di Junior All Star ta sigui avansá musikalmente. Durante e númeronan di Macay, vários intérprete a subi tarima pa kanta, manera e.o Carlos Salsbach,Erwin Kastaneer, Eddy Mar, Johny Maduro, Ramsy Frans i Stanley Reinilia. Arnel Salsbach tambe a bula riba piano den e número Djumbala den bo Bèshi. Durante e piesa Salsa Antianan i Djumbala den bo bèshi, Macai mes a kanta algun parti. Por a nota un Macai hopi alegre i emoshoná durante e presentashonnan di su kansionnan inolvidabel. Un atardi /anochi ku tabata karga ku emoshon ,alegria i nostalgia. Finalmente un danki spesial na tur e dosentenan ku a koperá pa prepará e hóbennan, manera Dick Faries, Johan Braaf, Hensley Jansen Renny Janga, Mariluo i Marlen Schoobaar, Ramsey Frans, Wendy Jane Gomes i Gedion Chandler i tambe na sekretariado di di Festival Center. Un danki tambe ta bai na medionan di komunikashon.
About the Author
