WILLEMSTAD – Djarason awor dia 15 di febrüari pa 6:30 pm lo tin un konsierto grátis ku Sambil i AMAK ta organisá pa pueblo di Kòrsou. Un orkesta a keda formá di músikonan di Kòrsou i tambe algun di e brass di Venezuela ku a bini pa toka den Festival di Tumba ku a tuma lugá resientemente.

A forma un Big Band konsistiendo di 4 Tròmpet, 3 Trombon, 5 Sax, piano, Bass, Guitara, Drùms, Konga i perkushon chikitu,  ku último dianan ku a pasa a ensayá vários kansion, pa trese esaki na pueblo di Kòrsou komo un gradisimentu.

Na 2018 i 2017 ya kaba Sambil i AMAK a yega di organisá un evento igual, kaminda e tempu ei a forma un ansable di metal, kaminda a interpretá vários kansion for di músika tradishonal di Venezuela komo internashonal.

E aña aki tambe lo tin 2 kansion di metal so, pero a amplia esaki ku kansionnan di Big Band, anto ku kanto. E biaha aki lo tin kansionnan kantá pa e konosido Tony Worrell, Reinir Lijfrock i Jose Pipo Villasmil.

Ta un ensayo relashoná ku e presentashon di e Big Band aki a tuma lugá i por bisa ku e orkesta ta zona tremendo.

Un invitashon ta bai na tur ku ta interesá pa disfrutá di un ora largu di músika na nivel tòp, pa ta presente den Sambil dilanti Convention Center, esta parti paden djarason awor dia 15 di febrüari 2023 for di 6:30 i  apoyá tantu e músikonan lokal komo e Venezolanonan ku ta aki, ku ta duna bek na Pueblo di Kòrsou.

Un boka bisa otro