Willemstad- E siman aki Kòrsou ta sirbi komo plataforma pa un kantidat di 19 pais, miembro di Union Postal de las Americas, España i Portugal (UPAEP), bini huntu pa analisá i diskutí evolushon di e sistema di remunerashon di e sistema postal. Cpost International N.V. ta anfitrion di e seminario aki di UPAEP ku ta den kuadro di preparashon pa e konferensha di Universal Postal Union (UPU) ku lo tuma lugá otro aña na Turkia. E tópiko trata ta unu importante pa servisionan postal rònt mundu enbista di e retonan ku organisashonnan postal rònt mundu ta konfrontá kuné debí na e.o. desaroyonan teknológiko, kambio den demanda di e kliente i kompetensha fuerte. UPAEP su ophetivo ta e.o. promové e servisio postal universal, fomentá koperashon efisiente di e miembronan, mehorá e kalidat di servisio i garantisá integrashon akshon di su miembronan den e strategia di UPU. E organisashon tin su orígen for di aña 1838 ora Ecuador, Venezuela i Colombia a funda Union Gran Colombiana. E organisashon durante añanan a transformá su mes den un organisashon Pan- Amerikano inkluso miembresia di Spaña i Portugal. E seminario ku ta keda tene na Kòrsou ta unu importante den preparashon pa e konferensha mundial di UPU ku próksimo aña ta tuma lugá na Turkia. Nos kompania postal CPost ta kontentu di por a logra trese e seminario aki Kòrsou. Aparte ku e ta brinda nos un oportunidat di ta anfitrion di un seminario importante asin’aki e ta na mes un momentu tambe un muestra di rekonosementu di Kòrsou su liderazgo den pensamentu riba e tereno postal.
About the Author
