Despues ku resientemente nos selekshon nashonal a enfrentá e ekipo di Montserrat na dos okashon i a logra klasifiká pa e siguiente buèlta pa e weganan eliminatorio di mundial Russia 2018, preparashonnan ya a kuminsá pa nos siguiente kompromisonan na yüni binidero kontra Cuba. Despues di algun negoshashon a yega na akuerdo ku e fecha nan pa e kompromisonan aki lo ta 10 i 14 di yüni binidero. Dia 10 di yüni pa 8or di anochi Kòrsou lo enfrentá Cuba den Stadion Ergilio Hato (SDK) miéntras 14 di yüni 4or di atardi Cuba lo enfrentá Kòrsou un bia mas na Havana, Cuba. Interes den e pueblo ta sumamente haltu pa asistí na tantu e partido ku lo tuma lugá aki na Kòrsou komo esun na Cuba, p’esei nos ke rekomendá tur hende ku ke bai Cuba pa presensia e wega aki i apoyá nos selekshon nashonal rumbo pa mundial Rusia 2018, pa tuma kontakto ku Insel Air òf un agensia di biahe pa asegurá bo lugá. Mas den transkurso di luna nos lo manda mas informashon pa tur ku ta interesá pa biaha ku nos selekshon.
Pronto karchinan lo ta na benta pa e partido ku ta tuma lugá 10 di yüni próksimo aki na Kòrsou.
E preisnan ta lo siguiente;
- VIP ta kosta Nafl.250,- (inkluí konsumo);
- Bou di tribuna kubri ta Naf.55,-
- Bou di tribuna kubri parti Festival Center ta Nafl.40,-
- Tribuna no kubri ta Nafl.30,- i den e sekshon aki mucha te ku 12 aña i 60+ ta paga Naf.15.-
Un yamada ta bai pa hinter e pueblo di Kòrsou pa sigui apoyá i sostené nos selekshon nashonal komo e number 12!
About the Author
