Un invershon di alrededor di 10 mion florin
Willemstad – Maduro & Curiel’s Bank konsiente ku su ret di Bankomatiko/ATM ta esun di mas grandi i ku e servisio di Bankomatiko/ATM ta un di esnan más usá, resientemente a inisiá e renobashon di nos ret di Bankomatiko/ATM riba tur isla. Ta trata aki di Bankomatikonan/ATM nan na Kòrsou, Aruba, Bonaire, St. Maarten, Saba i St. Eustatius. En total MCB Group tin 155 Bankomatiko/ATM di kual 64 na Kòrsou. Ku un invershon di alrededor di 10 mion florin MCB Group ta upgrade “hardware” i “software” di e Bankomatiko/ATM, hasiendo e eksperensia bankario di tur usuario aun mihó, fásil i agradabel.
E “hardware” nobo ta e promé fase den e upgrade total di e Bankomatiko/ATM nobo. Esaki tin entre otro un pantaya “touch screen” meskos ku riba telefòn selular, ku ya nos ta kustumbrá kuné.
Ya mas ku 23 Bankomatiko/ATM na Kòrsou a wòrdu kambiá i e proseso ta sigui. Usuarionan di e servisio di Bankomatiko/ATM ya kaba por a nota un kambio na e Bankomatiko/ATM na edifisio di Scharloo, WTC, Airport Hotel, Marchena, Vanddis Rio Canario 1 i 2, Muizenberg, Gosieweg Las Vegas, Esperamos Supermarket, Mangusa Rio Canario i Mangusa Hypermarket, Trupial Inn Hotel, Hilton Hotel, pòmpstashòn Sta. Maria 1 i 2, Centrum Piscadera, Gasora, Tera Kòrá, Brievengat brènch, Goisco, Sta. Maria brènch i nos brènch na Montaña. Lo remplasá e sobrá 41 Bankomatiko/ATM nan na Kòrsou gradualmente i den transkurso di 2019 lo kuminsá ku e di dos parti di e upgrade di e Bankomatiko/ATM nan ku ta instalashon di e “software”. Esaki lo brinda un eksperensia aun mas agradabel i algun servisio adishonal pa e kliente.
Maduro & Curiel’s Bank ta konvensí ku nos komunidat ta kla pa e siguiente nivel di eksperensia bankario, ku ya rònt mundu ta implementá i ku ta enfoká muchu mas riba “self-service”.
MCB Group ta kere ku tipo di invershon grandi asina no solamente ta bon pa e kliente, pero tambe ta mustra e konfiansa ku MCB Group tin den nos pais, habriendo kaminda pa kresementu den futuro. Pareu ku e invershon den operashon, MCB ta sigui invertí tambe den nos empleadonan pa medio di treining i desaroyo propio, pa nos por sigui brinda e servisio ekstraordinario ku semper a spera di nos. Nos ta konfia ku mas kompania ta dal e stap pa invertí den nan proseso, produkto i negoshi pa duna nos ekonomia un “boost” positivo.
About the Author
