No ta mucho tempo pasa oficina di Turismo a haci un promocion di nos beachnan, unda varios destinacion rond den nos region a uza nos beachnan pa nan propio promocion, demostrando con bunita nos beachnan ta. Awor ta toca turno na nos pa mantene esakinan.
Pa hopi aña no tabata tin fondo disponibel pa haci esaki, pero e ta un mantencion cu mester wordo haci. Awor atraves di mercadeo di oficina di turismo, tin fondo pa mehoracion di Producto Aruba. Aruba Tourism Authority antes tabata depende di Gobierno di Aruba pa inverti placa di belasting y awor den menos di 5 aña, ATA ta completamente independiente y por te hasta brinda bek na comunidad di Aruba. Un proyecto cu ta alcansa un inversion di mas di 10 miyon pa aña cu normalmente Gobierno lo mester a inverti pero cu awor ta carga pa oficina di turismo. Minister Oduber a gradici ATA pa esaki.
Entre e proyectonan andando tin e situacion riba nos beachnan. Despues di dos aña di combersacionnan awor ta yegando su culminacion y lo keda ehecuta den e simannan nos dilanti. Ta trata di e proyecto di beach policy cu ta reglamenta e area di beachnan na Aruba unda cu tabata tin varios construccionnan ilegal y entre otro situacionnan caotico di e diferente companianan di deporte acuatico. Banda di esaki tin tambe e inversionnan cu a wordo haci den e infrastructura. Esaki a bin despues cu a nota cu hopi di e turistanan di barconan crucero ta concentra na e beachnan den e area di hotel poniendo un presion enorme den e area. Cu e fondonan di TPF, ATA y FDA, awor ta crea espacionan di facilidad na otro beachnan publico, manera Arashi y tambe esun na Nikki Beach cu lo ubica kiosconan cu bañonan publico y parkeo pa acomoda e gran cantidad di bishitantenan cu nos ta ricibi y e usuarionan di beach.
Cu e proyectonan di riba beach y e infrastructura, ta keda falta un segmento pa culmina y resalta e calidad di e beach, cual ta den awa mes. Ta inicia cu e proyecto di santo, unda lo saca tur e lodo y sushedad cu tin den profundidad, pa yene bek cu santo limpi blanco den henter e area di Nikki Beach bay pa cas di Gobernador. Ta crea asina mas beach publico cu ta masha gusta pa nos localnan, specialmente den temporada di campamento, pero cu awor tambe lo ta na e nivel desea pa nos bishitantenan por disfruta di esaki.
Minister Oduber ta finalisa bisando: “E ta inversionnan grandi, e ta comienso di proyectonan cu mester tuma luga. Ya caba a sinta cu e comision y a identifica cu e siguiente paso, otro aña ta bira e area di Playa Linda, Holiday Inn y Marriott cu sigur mester di atencion. Nos kier corigi esaki y preserva esaki pa futuro.”
Cu tur e proyectonan aki tumando luga, ta sigur cu nos ta mehora e calidad di nos beachnan y sigui eleva e Producto Aruba.
About the Author
