Den e categoria di aeropuertonan manehando menos di 4 miyon pasahero
ORANJESTAD, Aruba – 23 di februari 2016: “Nos ta masha orguyoso mes di anuncia cu atrobe Aeropuerto Internacional Reina Beatrix di Aruba a bay cu e premio maximo, nos a resulta miho entre un lista di otro aeropuertonan den e region,” asina Jo-Anne Arends, Head of Airline Marketing na Aruba Airport Authority a anuncia den fin di siman. E ceremonia di “Routes Americas 2016” a tuma luga na San Juan, Puerto Rico. Esaki ta e unico foro basa riba rutanan den aviacion di henter e region Americano. E aña aki nan a kibra tur record di asistencia den tur nan 9 añanan di existencia, cu 750 participante compara cu 650 di aña pasa. Aruba tabata nomina pa di 10 biaha den e “Routes Marketing Awards” den e categoria di aeropuertonan cu ta maneha menos di 4 miyon pasahero.
E evento anual “Routes Marketing Awards” ta e reconocimento mas importante den e industria di aviacion internacional. Ta instrui aerolineanan pa vota pa e organisacionnan cu ta brinda e miho servicionan di mercadeo en general, resultadonan efectivo, y ta provee informacion di data of tecnicanan innovativo pa mantene rutanan existente y desaroya rutanan nobo.
Aruba a resulta e ganado absoluto den e segmento di Aeropuertonan cu ta maneha menos di 4 miyon pasahero. Na di dos luga a sigui Charleston International Airport y e Aeropuerto Internacional di nos isla ruman Corsou . “E reconocimento aki di nos partnernan den aviacion ta sirbi manera un confirmacion di e trabou duro y dedicacion, sigurando cu nos ta sosteniendo nos aerolineanan y manteniendo un relacion sano, sea cu nan ta aerolineanan chikito, mediano of esunnan mas grandi bulando distancianan largo”, asina Jo-Anne Arends a enfatisa.
Ta bon pa remarca cu e cuerpo di hurado cu a huzga nos aeropuerto como e miho den e area aki ta consisti di Adriana Hurtado, Director di Planning na Avianca, Olga Guizado, Senior Planning Analyst na Copa Airlines, Chris Kennedy, GM Network Planning and Global Partnerschip Development na Delta Air Lines y Dave Clark, VP Network Planning na JetBlue Airways.
Algun di e mencionnan special cu a haci durante di e ceremonia di “Routes Americas Marketing Award 2016” tabata den e seccionnan di “Fastest Growing Routes” y “Fastest Growing Markets”.
Aruba Airport Authority N.V. ta felicita su team completo y stakeholdernan cu e reconocimentonan, y ta gradici tur partner internacional y local, incluyendo Aruba Tourism Authority y Aruba Hotel & Tourism Association pa nan esfuersonan pa logra un otro aña exitoso.
Na aña 2015, aeropuerto di Aruba a maneha mas di 2.8 miyon pasahero, cu a encera un crecemento di mas di 14% den cantidad di pasahero compara cu e aña prome y un crecemento di 18% den capacidad. Pa e aña aki, Aruba Airport Authority N.V. ta premira di lo sigui crece, tanto den cantidad di vuelonan y cantidad di pasaheronan cu ta pasa dor di e terminal.
About the Author
