Willemstad 6 di desember 2020– For di 2010 tur fin di aña a bira un tradishon ku Aqualectra den estrecho kolaborashon ku Ministerio di Tráfiko, Transporte i Planifikashon Urbano (VVRP) ta dekorá prinsipalmente sentro di siudat di nos pais i tambe algun área pafó di sentro di siudat. Ku tur e dekorashon aki tabata krea un ambiente adishonal rondó di e temporada di Pasku i e esfera di pas ku ta reina den e temporada aki.
E aña 2020, ku ta drentando su fase final lo bai den historia komo un aña eksepshonal den tur sentido. Esaki prinsipalmente kousá pa e pandemia ku nos ta bibando i su efektonan. Un di e efektonan di e pandemia ta ku diferente tradishon ku nos a konosé, i ku prinsipalmente den temporada di Pasku ta prevalesé, no por sigui mas di e manera ku nos a kustumbrá. Esaki tambe ta konta pa dekorashon di nos sentro di siudat, i e aktividatnan konosí komo Pasku Fiesta di lus.
Aqualectra for di 2010 a bin ta liderá e trayekto di Pasku Fiesta di Lus ku aporte di Minsterio di VVRP i tambe Ministerio di Desaroyo Ekonómiko. Tradishonalmente e invershon den un temporada asina ta kuantioso, i Aqualectra sigur tabata kolaborá ku esaki den kuadro di gradisí komunidat pa e sosten i indulgensia ku Aqualectra den e aña ku ta kabando. Mirando e situashon lokal i tambe medidanan ku tin kaminda ta hasi un apelashon riba tur hende pa redusí mobilidat i kontaktonan sosial, Aqualectra despues di deliberashon ku Gobièrnu di Kòrsou ta opta pa limitá aktividatnan di Pasku Fiesta di Ius. Esaki no opstante e echo ku tin diferente pais den nos region ku si a kontinuá ku e tradishon aki.
Pa no pèrdè e tradishon kompleto, lo dekorá e siguiente áreanan:
- Kaya grandi di tantu Punda komo Otrobanda lo tin e tradishonal adorno di lus kologá, ku ta hasi un paseo ku famia den outo un plaser;
- Danki na Curcaçao Ports Authorithy (CPA), nos Emma brùg lo broma manera tur aña;
- Aqualectra lo dòrna su edifisionan prinsipal pa añadí un toke èkstra di fin di aña;
- E aña aki Aqualectra i Ministerio di VVRP ke stimulá aun mas gruponan partikular ku ke tuma e responsabilidat pa dòrna un área públiko, manera na por ehèmpel un rotònde, pa hasi esaki. Aqualectra ta dispuesto na koperá ku e tipo di inisiativanan aki, pa meskos ku a hasi esaki den añanan resien, i por ehèmpel e aña aki na Plaza Wiri, yuda krea espasio kaminda hende por kore pasa i atmirá e sitionan dòrná rònt Kòrsou.
Di e forma aki nos ta kolaborá pa huntu nos krea tòg un ambiente di Pasku ku ta stimulá un aktitut korekto dirigí riba kuida nos salú, salú di nos famia, amigu i konosí. Laga nos huntu tuma e akshonnan konsiente pa asina nos tin un fin di aña ku ta brinda un mihó perspektiva pa e aña nobo.
Aqualectra ta hasi un apelashon tambe riba komunidat pa atené nan mes na reglanan stipulá dor di gobièrnu pa loke ta trata e situashon rondó di e pandemia. Kòrda kuida bo salú i keda seif.
Potret pa kortesia dia Kara Productions
About the Author
