WILLEMSTAD – Siman pasá NV Bettina, ku for di sèptèmber aña pasá a entregá un petishon na gobièrnu pa haña un pèrmit pa habri un botika na Bandabou, a brinda minister Ben Whiteman di GMN e oportunidat ku su koperashon pa e pueblo entrante dia 10 di yüli por akudí atrobe na un botika propio.
Ultimo tempu minister Whiteman di GMN tin hopi asuntu kayente ku ta pisa riba dje. Di un forma rápido i adekuá e por deshasí di un di asuntunan prekario, esta pa yuda Bandabou haña su propio botika atrobe despues ku meimei di aña pasá esun anterior a hañ’é ta sera. E úniko kos ku mester sosodé ta ku ta duna lus bèrdè na Bettina NV pa habri ‘Botika Barber’.
Muestranan di apoyo
Resientemente ya e frakshonnan di MAN, MFK i PAIS den Staten públikamente a ekspresá nan apoyo pa pueblo di Bandabou por disponé atrobe riba un botika den nan bario riba e término mas kòrtiku posibel. Asina e siudadanonan no tin nodi bai te ‘stat’ pa por haña kualke remedi. Un hende ku ta malu no tin gana di bai tan leu ku outo òf transporte públiko pa buska remedi. Plataforma Bandabou tambe ta boga pa mas pronto posibel habri un botika den nan área.
For di djaluna dia 22 di yüni habitantenan di Bandabou meskos ku kualke otro hende por sostené e plannan aki poniendo nan firma bou di un petishon al respekto na e ofisina di dòkter kas Sommer na Barber.
Alohamentu
Siman pasá Bettina, ku ta manehá Botika Stakamahakchi na Montaña Rey tambe, a sigurá e mandatario ku nan por habri e botika na Barber den dos siman ku un stòk korektamente rekerí di remedi. Botika Barber lo kuminsá den un alohamentu temporal konsistiendo di dos kònteiner luhoso pa ofisina ku ta disponé di èrko, bali, sala di espera, rèki pa pone kos, etc. Ya nan a pone e unidatnan di ofisina aki na e sitio, pendiente pa por kuminsá. Pa haña e personal adekuá pa e botika tampoko lo no ta forma un problema i e sistema di kòmpiuter tambe por ta na kla na ora, asina direktor Suhesh Manichanda a laga sa den un karta na minister Whiteman.
Unabes ku Botika Barber kuminsá operá lo traha mesora riba e alohamentu permanente na e mesun sitio, djis pegá ku e ofisina di e dòkter di kas Sommer. Aya lo lanta un botika moderno ku Bandabou por ta orguyoso di dje. E sitio nobo ku a skohe na Kaya Irene Schoop 1, a lo largu di e kaminda prinsipal di Barber i skeins dilanti e pòmp di gasolin, ta alkansabel fásilmente i ta disponé di amplio oportunidat pa stashoná outo.
About the Author
