Willemstad – Müzik ta e pashon di boluntario Pempy (Frensley) Lucas. Durante e 8 lunanan benidero e lo kompartí su pashon ku mas di 1600 grandi ku ta biba i pasa dia na diferente instituto di kuido rònt Kòrsou. Pa medio di müzik e ke entretené nos grandinan pa nan pasa un tempu ameno ku kantikanan di antes.
Pempy Lucas tin basta luna ta kana ku e idea pa hasi algu pa nos grandinan den kasnan di kuido, sabiendo ku vários ta pasa nan dianan isolá òf ku tiki bishita di amigu i famia. Curaçao Cares – un organisashon ku tin komo meta pa fasilitá trabou boluntario i trese hende huntu ku e fin di kontribuí na koheshon sosial– a ser aserká pa inisiá i kordiná e proyekto. Ku sosten di El Tributo e proyekto “Nos·tal·gia” a ranka sali siman pasá i entre tantu Pempy Lucas a bishitá Huize Zorg en Hoop i Fundashon Pro Bista.
Pa tur dos instansia i nan klientela e tabata un evento di kanto, baile, pasa palu i hopi goso. E klientenan a kanta na bos haltu e kantikanan di nan hubentut. “Ta hopi bunita pa mira e klientenan gosa”, Lysayé de Windt di Curaçao Cares ta kompartí. “Müzik tin un poder speshal. Kantikanan di nos hubentut ta forma parti di nos memoria, i ora nos tendenan atrobe, e ta fomentá sintimentunan di nostalgia serka nos. Esaki bo por mira bek den e manera ku e grandinan ta ekspresá nan mes na momento ku Pempy Lucas ta kanta pa nan.” Haidel Haile, direktor di El Tributo ta orguyoso di e inisiativa: “Nos ta sostené e tipo di proyektonan aki, paso müzik ta e bos di nos ser. E ta resoná den kurason di personanan di tur edat’”
Durante di e luna di mei Pempy Lucas lo bishitá Fundashon Sonrisa, Fundashon Bo Wardador, Bejaarden Sosiliteit Cocolishi i Fundashon Kas di Ansiano Sikogeriatiko M.J Hugenholtz. Boluntarionan interesá pa pasa un mainta òf mèrdia alegre ku e klientenan di kasnan di grandi por inskribí nan mes riba website di Curaçao Cares (www.curacaocares.org).
About the Author
