Dediká na henter famia: dia 27 di aprel próksimo!
WILLEMSTAD – E aña aki ta marka e di 5 aña ku Renaissance Mall & Rif Fort ta tene su bazar riba Dia di La Reina, awó pa di 2 aña konsekutivo konosí komo e bazar pa selebrashon Dia di Rei. Dia 27 di aprel famia kompletu ta invitá pa bishitá Renaissance Mall i Rif Fort pa e selebrashon grandi aki. E aña aki konsentrashon ta riba dibertishon familiar. For di 10’or di mainta te 6’or di atardi lo tin diferente aktividat pa duna realse na e dia festivo.
Renaissance Mall & Rif Fort ta kuminsá e selebrashon for di 10’or di mainta ku e tradishonal bazar rondó di e fòntein di Renaissance Mall i parti paden di Rif Fort. Durante henter dia lo tin diferente aktividat spesial pa mucha e.o bouncers, weganan interaktivo, pintamentu di kara, obra di man i hopi mas. Ademas di esaki, lo tin entretenimentu musikal pa garantisá ku e ambiente lo ta unu tur afó. Lo tin músika di Dj Lu-C, Maarten Schakel, Cultureel Centrum Curaçao Muziek School, Típiko Pasa Bon i lo kulminá e evento ku Perfect Fourth. Tambe lo tin presentashon di partisipantenan pa Miss Teenage i grupo di baile Simia. E aña aki a agregá un show di moda na unda ku kasnan komersial lo desfilá e último tendensianan den moda. Lo modelá paña di e.o Totto Tu, Panache i mas.
Pa kompletá e selebrashon lo tin kuminda típiko hulandes tambe. Lo tin stènt ku ta ofresé entre otro frietjes, stampot, broodje krokèt, appelflap i hopi mas. Tambe lo tin popcorn, frio frio, churros, Dushi Waffels i suiker spin. Durante di dia por saka potrèt ku famia kompletu na e ‘Say Keshi Photo Booth’ i bai kas kuné komo rekuerdo. E aña aki e selebrashon riba Dia di Rei ta un bes mas na Renaissance Mall & Rif Fort. Henter famia por disfrutá di un dia yená ku entretenimentu pa grandi i chikí; disfrutá di e restorantnan ku riba e dia aki lo ta habri ofresiendo diferente deskuento, shòp den establesimentunan tantu den Mall i na Rif Fort i probechá di e preisnan spesial riba Dia di Rei.
About the Author
