Willemstad 25 mei 2016 – Manera ya ta konosí kaba, den e último dos lunanan aki un seri di pregunta a keda publiká dor di e parlamentario Hulandes sr. van Raak tokante UTS i su kompanianan supsidiario, kreando un impreshon eróneo ku tin un relashon entre UTS i kiebro ku lei kometé dor di terser den e mundu di “online gaming”. Relashoná ku esaki, den e delaster dianan, UTS a keda pensa hopi riba kiko e motibu por ta ku e mener aki ta keda insistí pa mancha nos bon nòmber, komo Kòrsou, UTS i algun persona yu di tera.
Despues di a lesa un artíkulo ku a sali den NRC dia 26 di mart 2016, skibí pa Camil Driessen, UTS a bin komprondé e rason pakiko den e delaster simannan aki el a bira blanku di krítika di sr. van Raak. Segun e artíkulo, Hulanda mes ta purbando na legalisá “Online Gaming” i bo por lesa klaramente ku tantu PvdA i VVD a sera un akuerdo pa kobra 29% belasting en bes di 20% di e lei ku a keda proponé. Por lesa e artíkulo aki riba http://www.nrc.nl/next/2016/03/26/de-gokhal-van-europa-1605099.
UTS por a konkluí, ku aki e wega ta sinta! Dor ku nos ta den Reino Hulandes, kualke kompania di “online gaming” ku establesé su mes legalmente na Kòrsou i ku tin un status di “offshore company”, por subi e merkado Hulandes na un forma legal i ofresé su servisionan legalmente riba e merkado Hulandes. E kompanianan aki lo paga solamente 2 pa 3% na belasting aki na Kòrsou i konsekuentemente e kompanianan ku ta establesé aki na Kòrsou lo tin un bentaha riba e kompania na Hulanda. Esaki lo trese kuné ku Hulanda lo no por kobra e belasting ku nan lo ke kobra. Esaki ta pone UTS kòrda tambe riba e “BRK regeling” ku un tempu Kòrsou tabatin.
Un bes mas, nos ta pèrmití ku Kòrsou ta birando víktima pa interesnan Hulandes. UTS ta urgí nos representantenan pa atendé e asuntu aki ku Gobièrnu hulandes i asina evitá ku un bes mas nos nòmber ta keda manchá innesesariamente.
About the Author
