Jaël Merced, fundadó di Skate Date semper tabatin e deseo di tin su propio empresa, pero semper el a bisa su mes dia ku yega asina leu, lo ta algu ku lo ta diferente i ku lo trese un diferensia.
Tabata 9 di desèmber 2017 ku Jaël Merced a haña e siguiente imahen riba ret sosial i el a bisa su mes ‘esaki t’é!’! Ta algu ku no tin aktualmente akinan na Kòrsou i despues di hasi investigashon el a bin saka afó ku no ta algu ku tin den Karibe tampoko “ofisialmente”. E motibu dikon e ta bisa “ofisialmente” ta pasobra tin diferente pèrsona ta ‘roller skate’, tabatin un evento di ‘roller skating’ den pasado i awor Skate Date ta bai presentá ‘roller skating’ den un forma diferente.
Jaël Merced su vishon ta pa introdusí un konsepto ku tin balor agregá na komunidat kaminda nos ta enkurashá harmonia pa medio di ‘dates’, dor di trese tur hende huntu komo un famia ku e aspirashon pa establesé relashonnan duradero i signifikativo. Den tur esaki, rèspet pa otro ta primordial.
E ‘Skate’ ta énserá e ‘roller skate’/’rolschaats’ i e ‘Date’ ta enserá un enkuentro entre dos òf mas pèrsona. Hopi biaha nos tin e tendensia di asosiá e palabra ‘date’ ku un enkuentro amoroso. Na Skate Date nos ta definí ‘dates’ komo un ekuentro sosial entre por ehèmpel miembronan di famia, mama, tata i yunan, tata i yunan, prima- i primunan, amistatnan, koleganan di trabou i parehanan. P’esei e slogan ‘It’s a date for everyone’, for di chikí te grandi. Tur hende ta bon biní na Skate Date (for di 5 aña). Skate Date kier hasi ‘roller skating’ asesibel pa tur tur pèrsona.
Aparte di ‘roller’ skating’ den un forma rekreashonal, nos lo ofresé lès den futuro i un programa distinto den un esfera agradabel pa tur edat. Nos ta aspirá pa kompartí nos pashon pa ‘roller skating’ dor di brinda e oportunidat pa un grupo di pèrsona sera konosí ku ‘roller skating’, kaminda nos ta rekonektá un otro grupo ku nan pasado. Esaki pa medio di diferente evento, manera StRoller Moms, un programa ‘anti bullying’ i ‘Back to 70’s’, ku afro, renchi di orea hoepel, shòrt ku mea haltu te na rudia, karson ‘bell bottom’ ètsetera.
Skate Date ta situá na Johan Cruyff Sport Court na Angolaweg z/n, Mon Repos I ta habrí djabièrnè ku djasabra, di 17:00 pa 23:00 I djadumingu di 11:00 pa 15:00. Den futuro, Skate Date lo ampliá su dia – i orarionan.
About the Author
