WILLEMSTAD – Maduro & Curiel’s Bank durante un resepshon chikí na patio di biblioteka Mongui Maduro a hasi entrega pa di kuater aña konsekutivo di Premio Komersiante Briante. Premio Komersiante Briante ta un premio ku Bo Banko Amigu ta otorgá anualmente na un persona, organisashon òf instituto ku a hasi algu ekstraordinario na benefisio di e sektor di Empresa Chikí na Kòrsou òf na un empresa ku a sobresalí i logra algu ekstraordinario. Komersiante Briante ta nòmber di e símbolo ku ta identifiká Maduro & Curiel’s Bank su Departamentu di Empresa Chikí (Small Business Unit). E símbolo ta un pòpchi ku tin un pera di lus riba su kabes i ta ilustrá e empresario chikí ku ta aserká Bo Banko Amigu ku su idea briante pa su negoshi i kon Maduro & Curiel’s Bank su Departamentu di Empresa Chikí ta bai e “extra mile “ pa yuda su idea kristalisá. Ku Premio Komersiante Briante, Bo Banko Amigu ta sigui stimulá i tambe konsientisá otronan pa kontinuá ku nan esfuerso pa e sektor tan importante aki pa nos ekonomia, e sektor di Empresa Chikí. Un komishon interno ta hasi investigashon i ta determiná e nominadonan for di kua ta nombra un ganadó apsoluto. Na aña 2011 e korant Empresa Chikí di Kámara di Komèrsio a gana e promé Premio Komersiante Briante. Sra. Caprice Augusta tabata e ganador na aña 2012 ku Kabei Kabei Incubator kual ta duna pelukeronan i barberonan e fasilidatnan nesesario pa por ehekutá nan negoshi den Plaza Nobo den Punda. Aña pasá Elite Hair Care Salon bou di maneho di sra. Leonor Migala Nisia a gana e premio prestigioso aki. Nominadonan pa Premio Komersiante Briante 2014 ta:
Sr. Shannon Obispu mihó konosí komo Spanks Banks
Skèmpi bou di maneho di sr. Gino Jacobs i sr. Boudino de Jong
Fundashon Negoshi Pikiña (FNP)
I Factor TV
Curaçao Cares
ActionCoach
The Golden Lady Distributors bou di maneho di sra. Thelma Simmons
Tur e nominadonan ariba menshoná a hasi algu ekstraordinario pa yuda eduká, guia òf sostené nos sektor di Empresa Chikí òf a sobresalí komo un empresario chikí eksitoso. E ganadó apsoluto di Premio Komersiante Briante 2014 a resultá e plataforma musikal Skèmpi. Mirando e oportunidat ku e plataforma online aki ta ofresé na e artistanan lokal, di Aruba, Sint Maarten i di islanan BES, pa nan por eksportá nan músika internashonalmente pa medio di internèt, a hasi e aña aki Skèmpi e ganadó apsoluto di Premio Komersiante Briante. Riba Skèmpi , e plataforma musikal , ta posibel pa skucha músika di nos artistanan di último kuater dékadanan pero tambe músika kontemporanio. Mirando ku awendia artistanan ta usa internèt hopi pa komersialisá nan músika, e plataforma aki ta duna nan e oportunidat úniko pa nan wòrdu skuchá den eksterior i kompetí ku artistanan internashonal. Maduro & Curiel’s Bank ta felisitá tur e nominadonan i Skèmpi, ganadó di Premio Komersiante Briante. Bo Banko Amigu ta enkurashá un i tur pa sigui sostené e sektor di Empresa Chikí. A alabes nan tambe tin oportunidat pa keda nominá i gana Premio Komersiante Briante na aña 2015. Bo Banko Amigu ta gradisí tur persona, organisashon òf instituto ku di un òf otro forma ta sostené e sektor di Empresa Chikí.
About the Author
