Kòrsou – Manera Landsloterij a bin ta anunsiá, e sorteo ku e premio mayó di Ang. 1.000.000 posponé dor di e desaroyonan rondó di e vírus di COVID -19 ta sigui dia 9 di yüli 2020. E sorteo aki ta e promé sorteo, ku lo wòrdu organisá despues ku Landsloterij a hañ’e obligá ta kanselá 4 sorteo den e periodo ku ta tras di lomba. Pa selebrá ku nos ta bek ku un sorteo mionario, Landsloterij kier a hasi algu spesial pa nos kumpradónan ku pa hopi aña ta sostené e loteria nashonal.
Den e búskeda na e premionan èkstra, Landsloterij kier a bin ku algu atraktivo ku tur hende lo por hasi bon uso di dje. Mirando e situashon ku hopi ta pasando aden, i e peso ku kompra di komestibel ta nifiká, a disidí di bin ku 10 premio di 1 aña largu komestibel pagá. Lo saka 10 ganadó ku lo gana ANG. 250,- , na komestibel kada luna durante un aña largu na e ganadó su supermerkado preferí. Huntu ku e premio aki lo bai tin tambe e premionan ku a kustumbrá kuné durante e sorteonan mionario. Djaweps dia 9 di yüli 2020 un persona riba Kòrsou, Aruba, Bonaire, Sint Maarten, Saba òf Statia lo ta felis ganadó di un premio gordo di un mion florin. Manera ta kustumber lo tin premionan atraktivo pa di dos i tres ganadó, respektivamente ANG. 200.000,- i ANG. 100.000,-, mas un gran kantidat di otro premionan efektivo.
Durante e temporada di “Lockdown” Landsloterij no a para ketu, na momentu ku a habri porta algun siman pasá, Landsloterij a introdusí un insentivá pa su rebendedónan por benefisiá for di dje. Tambe Landsloterij a hasi posibel pa rebendedónan kumpra brièchinan via di un sistema moderno, “safe” i lihé, manera entre otro pedido via na telefòn, via di e sistema di WhatsApp, i entrega di brièchi via “drive tru” i “delivery” te na kas.
Pa mas informashon over di Landsloterij i su sorteo mionario di dia 9 di yüli próksimo bishitá nos website www.landsloterij.org, nos página di Facebook òf sigui nos riba nos paginá di Instagram.
About the Author
