…CTB i Coridja Star Promotions ta sumamente orguyoso di 2013 Miss Universe Curaçao Eline De Pool,…
WILLEMSTAD- 29 di òktober 2013 – Curaçao Tourist Board (CTB) konhuntamente ku Coridja Star Promotions ta siguiendo tur e desaroyonan di nos representante Srta. Eline De Pool den e sertámen di 2013 Miss Universe na Rusia. Ámbos organisashon ta masha orguyoso di e presentashonnan di Srta. De Pool i tambe e impakto ku e’la kousa den medionan di komunikashon i serka e rusonan. Miss Universe Organization a habri e oportunidat pa vota pa bo kandidata preferí i asina dun’é e oportunidat pa ta den e finalista nan, por vota te un máksimo di 10 bia pa dia. Vota pa Eline siguiendo e link athunto i apoyá nos representante: http://www.missuniverse.com/members/contestants/year:2013 Kòrsou ta siguiendo e trayekto eksitoso di Srta. De Pool via di e popular medionan di komunikashon sosial manera entre otro Facebook. CTB i Coridja Star Promotions ta invitá un i tur pa ‘like’ e página di FaceBook di Miss Universe Curaçao i risibí último notisianan rondó di e sertámen kompañá pa potrèt, biografia i hopi mas. Loke tambe a hala masha atenshon riba FaceBook ta e video promoshonal di Srta. Eline De Pool na ruso. CTB ta invitá pueblo di Kòrsou pa wak esaki via di; https://www.facebook.com/missuniversecuracao 
Den un sertámen manera Miss Universe ta masha importante pa probechá kada momentu pa risibí atenshon positivo di prensa i esnan ku ta di importansia pa e sertámen. Tur dia di nobo Srta. De Pool ta duna su máksimo pa representá Kòrsou; e sa ku su komunidat ta sostené i dor di VOTA i afiliá na e página di Facebook un i tur por demostrá ku ‘Nos ta ku Eline de Pool, nos Miss Kòrsou’. CTB i Coridja Stars Promotion ta ekstendé un invitashon na pueblo di Kòrsou pa sintonisá e sertámen di Miss Universe ku lo tuma lugá na Crocus City Hall na Moscow, Russia djasabra 9 di Novèmber, 2013 próksimo. Un i tur por mira transmishon bibu di e sertámen aki via di kanal di televishon internashonal NBC pa 10’or di anochi. Palabranan di éksito na nos 2013 Miss Universe Curaçao Srta. Eline De Pool!
About the Author
